香港舖租咁貴，東京著名麵店登陸香港，相信亦唔敢開得太大，以免為業主打工。嗱，本欄幾年前寫過（因當日在門口見證佢嘅盛大開幕）嘅美國成衣T恤店A&F，曾有報導話月租接近一百萬美元，最近已經關門大吉啦，畢打街之唯一旗艦店已經人去樓空，A&F黯然引退，幾年來相信捱貴租捱到好肉痛，母公司股價在紐約一度跌到每股12.60美元，比幾年前嘅50元相差甚遠。呢個故事教訓一啲零售店、食店：租金太高足以殺死公司。
講番食麵，香港年輕人愈來愈少吃飯，食粉食麵食pizza就日多，香港係自由市場，無人理會呢個大趨勢。40幾年前，左丁山寫經濟學碩士論文，曾經想以香港進口食米為題目，指香港食米進口商係一個走下坡行業，但因當時香港經濟數據貧乏，1950、1960年代嘅GDP數字都未有，教授認為資料不足，否決咗左丁山嘅論文題目，但從嗰陣開始，左丁山就對食米係inferior good（即收入需求彈性低於一）嘅理論，深信不疑。
日本人現在吃拉麵成風，又西化日深，於是食米消費急速下滑，最近睇新聞，日本農民種米嘅生計受重挫，稻米滯銷，日本稻米消耗量自1962年一路下滑至現在，1962年每人每年吃米118.3公斤，到2013年日本人每年只吃米56.9公斤，每日只吃150克左右。50年來，大潮流如此，令日本政府，特別係農林水產省束手無策，農民視種米為虧本生意，每年全國有148平方公里大嘅稻米田變成多餘，本應可用作住宅用地或工商業、旅遊休閒用地，但日本傳統要保護農民，執政黨自民黨極度依賴農村選票，邊度肯順勢順潮流改革吖，唯有實行大力宣傳新一代食物不健康，不環保，西化食物不合文化傳統等等，向年青人宣傳多啲吃飯；下一代年青人（包括香港千禧代）聽唔聽？恐怕難啲咯，依家連中年人、老年人都話怕吃飯，指米嘅糖含量過高，唔健康喎，晚餐不吃飯又話可以減肥㖭！1960年代有綠色革命，增加產米量救人類，曾是偉大工程，現在好似係笑話㖭！ 
