官话文字版

荣少個伯爺係澳门一間大酱园嘅老板,佢間酱园出品嘅蚝油,虾酱,辣椒酱畅销港澳星马。荣少個老母係佢伯爺嘅三姨太,係土生葡人,祖籍葡萄牙,所以荣少嘅外貌有啲“鬼鬼哋”,加埋佢曾经喺葡萄牙读咗几年大学,举手投足不免有些少西人嘅派頭。不過又怪噃,佢呢個“半唐番”竟然对粤剧好有兴趣,唔净止識得欣赏,重唱得几咀添,而且唱得嚟中规中矩,成为澳门街上嘅一段佳话。同荣少一家相熟嘅人口中传出咗个中因由,啲人至恍然大悟。荣少個伯爺同原配夫人都係粤剧迷,荣少满月嘅时候,佢伯爺就请咗当时一个好有名嘅戲班出堂会,喺屋企大宴亲朋。当奶妈抱住啱啱满月嘅荣少出嚟亮相嘅时候,原先驚住满堂宾客嘈嘈吵吵，加埋台上大锣大鼓吓親個少爺仔,大家都紧张到不得了。點不知呢個被人包到隻粽咁嘅骚虾仔,個头仔唔郁得啫,對眼仔碌碌就两頭望,引到周围嘅人一阵阵惊叹。

荣少三岁嘅时候,佢个生母出车祸死咗。佢伯爺個二姨太,即係荣少個二娘就孭起照顾,督导荣少嘅责任。二娘自己冇生落一男半女,自从荣少一出世，二娘就好疼惜佢,荣少嘅生母唔在咯,二娘对荣少就更加多几錢肉緊。二娘原先係梨园中人,嫁咗荣少個伯爺之后就唔再登台,只不过偶然間喺啲慈善演出度客串下。每逢省港大老倌登台唱戲,荣少個伯爺都会带住大娘,二娘去捧场,有时又会带埋荣少一齊去。荣少初頭纯粹係“貪高興随大流”,对曲词曲调毫無认识,难得嘅係佢喺剧场唔会嫌闷嫌冇癮。其实佢伯爺心中有数嘅,但凡大段文唱嘅戏码就唔会带荣少去睇,故此荣少初時睇嘅大戲多數都係 《五郎救弟》,《沙陀班兵》之类嘅武生戏。到佢大個啲,睇戏,听戏嘅范围就广啦,睇唔明,听唔明白嘅地方,仲可以请教二娘,荣少对粤剧嘅兴趣就系咁一直都维持住。講到喺葡萄牙讀大学嗰几年,荣少話最唔惯嘅就係冇“大戏”睇。

荣少大学毕业之后就返到澳门,喺佢伯爺間酱园度做嘢,协助处理香港嘅业务。港澳两地虽然相距唔係好远,當時唯有搭船一條路,來回一趟都要唔少时间。因此荣少次次到香港都会住返几日。逗留期间,商场上嘅饮宴应酬自然唔少得。依照商界不成文嘅规矩,食晏只不過係便飯,正式嘅宴请必定安排喺夜晚。最隆重嘅係晚饭之后重有“余庆节目”,亦即係俗称嘅“晚饭直落”。“直落”要落到乜嘢时候并冇一定嘅标准,視乎交情深浅而定。荣少初初介入香港业务嘅时候,啲客户唔知道荣少嘅喜好,按常规晚宴结束就陪住荣少到当时最大嘅舞厅去消遣。舞厅里面嘅“大班”見几个相熟嘅老板众星拱月咁陪住嗰英俊少年,知道荣少係当晚嘅主角,格外醒神,不停咁带住旗下嘅舞女嚟坐台。舞厅啲小姐阅人无数,只要来到呢张檯坐,无不使出浑身解数,希望能夠留低深刻印象俾呢位少爷。荣少来者不拒,同每位小姐都跳咗隻舞。荣少身材高大,舞艺娴熟,跳起舞嚟潇洒自如,风度翩翩。又唔似得一啲舞客咁,特登要索小姐油,更加之令到啲小姐芳心暗许,转台嘅时候一个个都依依不舍咁样。食宵夜嘅时候,香港客户贊荣少舞跳得好,是必係濠江花国常客。不料荣少对佢哋話,交际舞係读书嗰阵時学嘅,自己平時凈係喺家庭舞会度跳,舞厅就好少去,亦请各位以后唔使安排呢类活动。后来有人得知荣少鍾意睇“大戏”,遇啱有名嘅大老倌演出，有好戏码就请荣少去睇,荣少就从來都冇托手踭。荣少同妙霞嘅姻缘就係因為一场戏而起。

同阿文傾閑偈嘅时候,妙霞話 18 岁生日係佢呢一世人最难忘嘅日子。佢哋屋企冇乜錢,兄弟姐妹过生日亞妈就係咁意煮几只红鸡蛋。自己 18 岁生日係星期日,咁啱班主個仔阿勇组织咗剧团班後生仔女去“露营”烧烤。由于亞爸亞妈管得比较严,妙霞自細好少参加呢类喺外头过夜嘅活动。为咗令到妙霞有得同大家一齊去玩,阿勇亲自向妙霞個妈妈财婶攞人情。财婶喺剧团里面负责幫啲演员梳头,算係睇住阿勇大,知道阿勇個性沉稳,唔係嗰停冇责任心，做事冇分寸嘅后生仔,所以放心畀妙霞跟埋佢哋一齐去，故此妙霞就认识咗荣少啦。

未完待续。。。。。。