官話文字版

榮少個伯爺係澳門一間大醬園嘅老闆,佢間醬園出品嘅蚝油,蝦醬,辣椒醬暢銷港澳星馬。榮少個老母係佢伯爺嘅三姨太,係土生葡人,祖籍葡萄牙,所以榮少嘅外貌有啲“鬼鬼哋”,加埋佢曾經喺葡萄牙讀咗幾年大學,舉手投足不免有些少西人嘅派頭。不過又怪噃,佢呢個“半唐番”竟然對粵劇好有興趣,唔淨止識得欣賞,重唱得幾咀添,而且唱得嚟中規中矩,成為澳門街上嘅一段佳話。同榮少一家相熟嘅人口中傳出咗個中因由,啲人至恍然大悟。榮少個伯爺同原配夫人都係粵劇迷,榮少滿月嘅時候,佢伯爺就請咗當時一個好有名嘅戲班出堂會,喺屋企大宴親朋。當奶媽抱住啱啱滿月嘅榮少出嚟亮相嘅時候,原先驚住滿堂賓客嘈嘈吵吵，加埋台上大鑼大鼓嚇親個少爺仔,大家都緊張到不得了。點不知呢個被人包到隻粽咁嘅騷蝦仔,個頭仔唔郁得啫,對眼仔碌碌就兩頭望,引到周圍嘅人一陣陣驚嘆。

榮少三歲嘅時候,佢個生母出車禍死咗。佢伯爺個二姨太,即係榮少個二娘就孭起照顧,督導榮少嘅責任。二娘自己冇生落一男半女,自從榮少一出世，二娘就好疼惜佢,榮少嘅生母唔在咯,二娘對榮少就更加多幾錢肉緊。二娘原先係梨園中人,嫁咗榮少個伯爺之後就唔再登台,只不過偶然間喺啲慈善演出度客串下。每逢省港大老倌登台唱戲,榮少個伯爺都會帶住大娘,二娘去捧場,有時又會帶埋榮少一齊去。榮少初頭純粹係“貪高興隨大流”,對曲詞曲調毫無認識,難得嘅係佢喺劇場唔會嫌悶嫌冇癮。其實佢伯爺心中有數嘅,但凡大段文唱嘅戲碼就唔會帶榮少去睇,故此榮少初時睇嘅大戲多數都係 《五郎救弟》,《沙陀班兵》之類嘅武生戲。到佢大個啲,睇戲,聽戲嘅範圍就廣啦,睇唔明,聽唔明白嘅地方,仲可以請教二娘,榮少對粵劇嘅興趣就系咁一直都維持住。講到喺葡萄牙讀大學嗰幾年,榮少話最唔慣嘅就係冇“大戲”睇。

榮少大學畢業之後就返到澳門,喺佢伯爺間醬園度做嘢,協助處理香港嘅業務。港澳兩地雖然相距唔係好遠,當時唯有搭船一條路,來回一趟都要唔少時間。因此榮少次次到香港都會住返幾日。逗留期間,商場上嘅飲宴應酬自然唔少得。依照商界不成文嘅規矩,食晏只不過係便飯,正式嘅宴請必定安排喺夜晚。最隆重嘅係晚飯之後重有“餘慶節目”,亦即係俗稱嘅“晚飯直落”。“直落”要落到乜嘢時候並冇一定嘅標準,視乎交情深淺而定。榮少初初介入香港業務嘅時候,啲客戶唔知道榮少嘅喜好,按常規晚宴結束就陪住榮少到當時最大嘅舞廳去消遣。舞廳裡面嘅“大班”見幾個相熟嘅老闆眾星拱月咁陪住嗰英俊少年,知道榮少係當晚嘅主角,格外醒神,不停咁帶住旗下嘅舞女嚟坐檯。舞廳啲小姐閱人無數,只要來到呢張檯坐,無不使出渾身解數,希望能夠留低深刻印象俾呢位少爺。榮少來者不拒,同每位小姐都跳咗隻舞。榮少身材高大,舞藝嫻熟,跳起舞嚟瀟灑自如,風度翩翩。又唔似得一啲舞客咁,特登要索小姐油,更加之令到啲小姐芳心暗許,轉台嘅時候一個個都依依不捨咁樣。食宵夜嘅時候,香港客戶贊榮少舞跳得好,是必係濠江花國常客。不料榮少對佢哋話,交際舞係讀書嗰陣時學嘅,自己平時凈係喺家庭舞會度跳,舞廳就好少去,亦請各位以後唔使安排呢類活動。後來有人得知榮少鍾意睇“大戲”,遇啱有名嘅大老倌演出，有好戲碼就請榮少去睇,榮少就從來都冇托手踭。榮少同妙霞嘅姻緣就係因為一場戲而起。

同阿文傾閑偈嘅時候,妙霞話 18 歲生日係佢呢一世人最難忘嘅日子。佢哋屋企冇乜錢,兄弟姐妹過生日亞媽就係咁意煮幾隻紅雞蛋。自己 18 歲生日係星期日,咁啱班主個仔阿勇組織咗劇團班後生仔女去“露營”燒烤。由於亞爸亞媽管得比較嚴,妙霞自細好少參加呢類喺外頭過夜嘅活動。為咗令到妙霞有得同大家一齊去玩,阿勇親自向妙霞個媽媽財嬸攞人情。財嬸喺劇團裡面負責幫啲演員梳頭,算係睇住阿勇大,知道阿勇個性沉穩,唔係嗰停冇責任心，做事冇分寸嘅後生仔,所以放心畀妙霞跟埋佢哋一齊去，故此妙霞就認識咗榮少啦。

未完待續。。。。。。