阿文一路行一路回憶往事,喺一個街角幾乎畀架膠轆木頭車撞親.好彩推車個人出力監生停住架車,故此冇撞到,彼此都嚇咗一跳.阿文擔高頭一睇,原來係熟人.
呢個人陰陰嘴笑住問: "阿文,諗緊乜嘢呀，諗緊女仔哩?"
阿文紅住塊面應佢:"係...唔係. 唉!明哥唔好玩我啦,我係諗緊嘢,不過唔係你講嗰啲嘢."
呢個人外號"蛇仔明",佢喺"水務局"度有份工做緊.同時又係一個"走鬼"小販.

香港嘅小販分"有牌"同"冇牌"兩大類,"有牌小販"就係喺政府嘅"小販管理處"登記咗,備咗案,領取咗營業執照,喺指定範圍營業嘅小商販。"無牌小販"就係冇領取營業執照嘅小販,佢哋冇固定嘅經營點,基本上都係流動賣貨.呢類流動小販唔淨只廟街獨有,香港本島,九龍半島以致新界都有佢哋嘅身影.佢哋或者出沒喺戲院嘅大門口,亦都會喺商場外面人行道擺檔.平心而論,佢哋的確為廣大市民提供咗唔少價格相對低廉嘅生活用品同食品。不過亦都為市民嘅日常生活帶來某啲負面影響.譬如佢哋喺鬧市嘅人行道賣貨,貨攤同顧客就會阻窄條人行道.路人就要行落馬路,造成一定程度嘅危險。尤其是嗰啲熟食攤檔,木頭車上面有火爐,有滾水,對行人亦係一種威脅。故此,政府設有一個專門嘅機構負責清理呢啲無照經營嘅小販,呢個機構個名係"小販管理隊"。佢哋會唔定期,唔定點咁去拉啲"無牌小販"。"無牌小販"俾人拉咗，除咗啲生財工具被沒收之外,仲會被判交罰款。凡係有"小販管理隊"喺一笪地方拉人,其他"無牌小販"就會互相提水,大嗌"走鬼呀!".久而久之,"走鬼"呢兩個字竟然成為"無牌小販"嘅代稱.

"蛇仔明"有一份令人艷羨嘅"皇家工",有固定收入.由於職位低,薪水唔算高,故此放工之後，挨晚時分就會推住架膠轆木頭車"走鬼"賣時令食物.所謂時令食物其實不過得以下幾種:天冷賣"生炒糯米飯","碗仔翅"同"蛇羹",天熱就賣各色糖水.阿文見佢今晚所賣嘅係"木瓜雪耳"同"綠豆沙"兩樣.講真嗰句,"蛇仔明"嘅糖水都幾好味嘅,加上價錢唔貴,所以都有唔少人捧場。至於天時冷售賣嘅"蛇羹"同"碗仔翅"就絕對係"掛羊頭賣狗肉"啦.嗰兩樣嘢嘅味道都過得去咖,只不過係冇蛇肉同埋魚翅。當然,大家都知道,使三兩個錢就想食到蛇肉同魚翅無疑係天方夜譚,因此亦都冇人認真計較.

照計呢個"蛇仔明"日頭一份正職,夜晚一份副業,又冇家庭負擔,一支公喫飽全家唔餓,日子應該過得好疏肝.點不知佢周身唔掂,日日嗌窮.究其根源,兩個字:爛賭!

"蛇仔明"賭澳門狗,賭香港馬,麻將,牌九無所不好.偶然間"過大海"到澳門賭唔在講,有時仲要幫襯下 "大檔".常言道"十賭九輸",只不過"賭仔"個個都唔信邪，佢哋寧願信“終須有日龍穿鳳,唔通日日褲穿窿”。成日望"時來運到"嗰一日。

阿文知道"蛇仔明"嘅嗜好,隨口問咗一句:"明哥呢一 輪狗馬亨通嗎?"
只要係涉及賭嘅話題,"蛇仔明"都會精神奕奕,口水花噴噴.呢一日就有啲反常,佢冇釐神氣咁話:"嚡! 唔好提啦。前一排頭頭碰着黑。買獨贏跑位置，買位置跑脫腳。買細開大，買大開細。左一巴，右一巴，輸到我頭擰擰。”
阿文一聽唔對路，諗住轉移話題或者直頭較腳。
點知“蛇仔明”忽然間話鋒一轉：“好彩天無絕人之路，上個禮拜六，老鼠仔醒咗壇堅料俾我，卒之贏返場冷馬。”
"咁嘅話豈不是大豐收咯?"
"衰在前一排輸得勁哩,冇乜子彈,若不然就真係乜仇都報番曬啦!"

"老鼠仔"曾經喺某個練馬師手下做過"馬夫",手腳麻利又肯食腦.工作中學咗唔少"相馬"同操練嘅知識.某個偶然嘅機會,佢結識咗一個好鍾意賭馬嘅老闆,就做咗呢個老闆嘅"馬仔",利用佢喺馬圈嘅人際關係,幫佢老細四圍攞料.呢個"老鼠仔"同"蛇仔明"有多少親戚關係,早幾年落魄嘅時候"蛇仔明"亦關照過佢.故此佢有時候會偷偷彈啲碎料俾"蛇仔明".凡係"老鼠仔"彈俾佢嘅料,"蛇仔明"都信到十足,皆因呢啲料都幫"蛇仔明"贏過下錢.即使係衰咗"蛇仔明"都唔會灰心.佢成日話: 貼士若然次次都靈,咁仲使做咩?

雖然明知"蛇仔明"呢停賭仔"三更窮,五更富"嘅幻想大多數都係衰收尾，阿文聽見佢話喺馬場有所斬獲都真心戥佢高興。正想話對"蛇仔明"講返幾句賀下佢,.點知"蛇仔明"塊面忽然間轉曬色，慌慌失咁望住阿文嘅背後,失驚冇神將佢架木頭車一個 180 度大迴旋,向住先頭嚟嘅路退返去,留低一串漸漸減弱嘅說話:"阿文下次再傾,係咁先."

阿文車轉身一睇,先至知道點解"蛇仔明“冇鞋拎屐走”.原來係“牛精洪”帶住幾個馬仔大步流星咁向呢邊行緊過來。呢個"牛精洪"係廟街一個字頭嘅小頭目,專門負責放貴利同收數。
"牛精洪"行埋阿文身邊,先行整咗一句: "呢個契弟,算佢好彩,下次見到打跛佢對腳先。"
跟住就問阿文:"阿文,收工啦?"
"係呀洪哥,我啱啱收工."阿文應咗佢“乜蛇仔明又差落好多數咩?”
"數就唔係大,衰在佢上個禮拜贏咗馬都唔主動還錢,正一撲街冚家鏟!”
阿文話:“洪哥真係消息靈通.”
“蛇仔明份人,贏咗少少就通街唱話佢有獨家貼士,成條街有邊個唔知呀.”
“話時話啦,洪哥,佢唔還錢,你咪賺多啲息啫?”
“我驚佢下次連老婆本都輸清光,我點同老大交待喎？”
阿文知道“牛精洪”呢幾句說話係講畀佢啲馬仔聽,笑一笑冇搭嗲.
“牛精洪”拍下阿文嘅肩膀問:“今晚紅姐返嚟廟街開 patty ,你哋曲藝團仲開唔開檔呀?”
阿文話:“梗係要開啦,紅姐就話上咗岸啫,我哋仲喺個海度浮浮下噃.”
“阿文你真識講笑.邊個唔知你哋呢幫人係賺錢買花戴呀.”“牛精洪”笑住話，
“好啦,我仲有事,行先啦.”講完就帶住幾個馬仔行咗去.
阿文對住佢嘅背影講咗聲:"洪哥慢行."

呢個"牛精洪"係典型嘅廟街"地膽",自細就跟住佢個阿叔行古惑。有一次幫會打鬥,佢為咗掩護自己嘅大佬撤退,俾人劈低之後仲死抱住對方隻腳,挨多咗幾刀。事後大佬對佢自然大為贊賞。“牛精洪”雖然得個小學畢業，但係佢對數字有特別敏銳的觸覺。於是老大要佢帶住幾條靚放數收數."牛精洪"生得牛高馬大,黑黑實實,唔知根兜嘅人都以為佢係一個大老粗.其實佢係一個粗中有細,進退有序嘅精明人.佢對廟街大大細細嘅商戶同埋啲“潛在客戶”嘅經濟狀況都好清楚,放數嘅額度把握得好准。佢將問佢借貸嘅人分成不同嘅類別，借貸嘅利息亦都各有不同。如果係商販拆借，佢會收取較低嘅利息。至於一般冇固定收入啲“蠱惑仔”借貸，收嘅利息相對就要高啲，有時仲要有人擔保。因為呢啲“蠱惑仔”話唔埋邊一日會玩失蹤，風險會大啲。不過，同某啲“大耳窿”嗰種“九出十三歸”嘅借貸方式比起來，“牛精洪”算得上係“大善人”啦。“九出十三歸”嘅意思係，借款人將要為借貸嘅數額支付 30 % 嘅利息。譬如話，你要同“大耳窿”借 1,000 文，還款期到咗就要還 1,300 文。不過，你借款當日到手嘅實際金額只得個 900 文。按照“大耳窿”嘅講法，嗰 100 文係“無抵押借貸”嘅風險金同埋手續費。“牛精洪”定嘅息口相對有吸引力，佢催數嘅手段同其他行家比起嚟亦算客氣。雖然有時佢亦會對一啲拖欠帳款嘅人出言恫嚇,但係佢從來唔會將債戶逼到絕路。故此需要資金周轉嘅人都傾向問佢借債。自從佢負責字頭嘅放數業務以來，成績都算係蒸蒸日上，而且基本上冇爛賬。所以老大對佢好滿意,亦俾咗佢更大嘅權限.

"牛精洪"提到開檔,阿文好自然咁又諗起咗蘇師奶,佢個姑姐。如果唔係姑姐大力拍和,佢哋呢個曲藝團未必會成立。“牛精洪”話佢哋呢幫人“賺錢買花戴”呢句說話都有幾分道理。相對於喺廟街擺檔賣唱嘅其它“曲藝團”，佢哋成立呢個曲藝團嘅初衷的確唔係為咗賺錢.

"廟街"喺香港旅遊發展局嘅宣傳資料度被列為一個旅遊點，被作為"poor people‘s night club"介紹俾外國遊客.“廟街”係九龍油麻地嘅一條街道，但係作為“平民夜總會”嘅“廟街”涵蓋嘅範圍絕對唔止嗰條唔算太長嘅街道。除咗寶靈街同佐頓道南邊一段“廟街”冇燈光夜市之外，每到華燈初上，佐頓道北邊一段廟街全部係一個接一個嘅攤位。亦即係話，由佐頓道嘅北面開始，中間仲要穿過“加士居道”，一直到“熙龍里”，有為數眾多嘅大牌檔同埋售賣各式小商品嘅燈光夜市。喺呢度，你可以買到男性服裝、針織服裝、恤衫、牛仔褲、鋼筆、手錶、錄音帶、錄影帶，電子產品、玩具、旅行袋。你亦可以買到手工藝品、茶具、玉器、古董、以至成人用品等等等等。“廟街”最有特色嘅係天后廟前嘅“榕樹頭”。除咗各式各樣嘅檔攤，呢度仲有俗稱“照田雞”嘅占卦算命，有踎喺樹頭嘅講古佬，有唔同類型嘅“曲藝團”表演不同嘅節目。由阿文個舅公“扯頭纜”成立嘅曲藝團就是其中一個演出單位。

官話版

阿文邊走邊回憶往事,在一個小街的拐角幾乎被一輛膠輪木頭車撞倒.幸虧推車的人使勁把車生生停住,才沒有撞上,但彼此都嚇了一跳.阿文抬頭一看,原來是熟人.
這人一臉壞笑地問: "阿文,想什麼呢?在想女孩子嗎?"
阿文紅着臉說:"是...不是. 唉!明哥不要玩我啦,我是在想事情,不過不是你說的事."
這人外號"蛇仔明",他在"水務局"工作.也是一個"走鬼"小販.

香港的小販分"有牌"和"無牌"兩大類,"有牌小販"就是在政府的"小販管理處"登了記,備了案,領取了營業執照,在指定範圍營業的小商販."無牌小販"就是沒有領取營業執照的小販,他們沒有固定的經營點,基本上都是流動售貨.這類流動小販並非廟街獨有,香港本島,九龍半島以致新界都有他們的身影.他們或出沒在電影院的大門口,也會在商場外的人行道上擺賣.平心而論,他們的確為廣大市民提供了不少價格相對低廉的生活用品和食品.不過也給市民的日常生活帶來某些負面的影響.譬如他們在鬧市的人行道售貨,貨攤以及顧客就會擠占了人行道.路人就要走到車道上去,造成一定程度的危險.尤其是那些熟食攤檔,木頭車上有爐子,熱湯水,對行人也是一種威脅.因此,政府設有一個專門的機構負責清理這些無照經營的小販,這個機構的名稱是"小販管理隊".他們會不定期,不定點地抓捕"無牌小販",被抓到的"無牌小販"除了生財工具被收繳之外,還會被判交罰款.每當"小販管理隊"在某處執勤,其他"無牌小販"就會互相示警,大叫"走鬼呀!".久而久之,這"走鬼"二字竟成了"無牌小販"的代稱.

"蛇仔明"有一份令人艷羨的"皇家工",有固定收入.但由於職位低,薪水不算高,因此下班以後，傍晚時分就會推着一輛膠輪木頭車"走鬼"賣時令食物.所謂時令食物其實也不過以下幾種:冬天賣"生炒糯米飯","碗仔翅"和"蛇羹",夏天就賣各色糖水.阿文看到他今天所賣的是"木瓜雪耳"和"綠豆沙"兩樣.說真的,"蛇仔明"的糖水是有一定的水平,加上價錢不貴,所以有不少的捧場客.至於冬季售賣的"蛇羹"和"碗仔翅"則絕對是"掛羊頭賣狗肉".那兩樣食品的味道還是蠻好的,偏偏就是沒有蛇肉和魚翅.當然,大家都知道,花兩個小錢就想吃到蛇肉和魚翅無疑是天方夜譚,因此也不會有人較真.

按理說,這個"蛇仔明"白天一份正業,晚上一份副業,又沒有家庭負擔,一個人吃飽全家不餓,小日子應該過得很滋潤.可他卻是寅吃卯糧,天天叫窮.究其根源,兩個字:好賭!

"蛇仔明"賭澳門的狗,賭香港的馬,麻將,牌九無所不好.偶爾"過大海"到澳門賭不說,有時還光顧香港的地下賭場 - "大檔".常言道"十賭九輸",但"賭仔"個個都不信邪.他們信奉的是“終須有日龍穿鳳,唔通日日褲穿窿”，總是寄希望於"時來運到"的那一天.

阿文知道"蛇仔明"的嗜好,隨口問了一句:"明哥這一陣狗馬亨通嗎?"
只要涉及賭的話題,"蛇仔明"都會精神奕奕,口沫橫飛.這天卻有點反常,他沒精打采地說:"嗨! 別提了。前一陣事事不順。買獨贏跑位置，買位置跑脫腳。買小開大，買大開小。左一巴掌，右一巴掌，輸得我暈頭轉向。”
阿文一聽不對頭，準備轉移話題或者直接開溜。
不料“蛇仔明”忽然間話鋒一轉：“幸虧天無絕人之路，上個星期六，老鼠仔給我提供了內幕消息，終於叫我贏了一場冷門馬。”
"那豈不是大豐收咯?"
"可惜前一陣子輸得太多,沒有子彈,要不然可真要一飛沖天了!"

"老鼠仔"曾經在某個練馬師手下當過"馬夫",手腳麻利也肯動腦筋.工作中學了不少"相馬"和操練的知識.某個偶然的機會,結識了一個愛賭馬的老闆,就當了這個老闆的"馬仔",利用他在賽馬圈子裡的人脈關係,為他的老闆四處打探消息.這個"老鼠仔"跟"蛇仔明"有點親戚關係,早些年落魄的時候"蛇仔明"也曾經幫過他的忙.因此他有時候會偷偷給"蛇仔明"提供一些小道消息.對於"老鼠仔"提供的信息,"蛇仔明"深信不疑,因為這些小道消息幫助"蛇仔明"贏過些錢.即使落敗"蛇仔明"也不灰心.他常說: 貼士若是每次都靈光,那還用幹活嗎?

雖然知道"蛇仔明"這類賭仔"三更窮,五更富"的幻想最後大多數還是以幻滅告終,但阿文還是真心為他高興能在馬場有所斬獲,正要對"蛇仔明"說上幾句道賀的話,.卻見"蛇仔明"臉色一變，神色慌張地望着阿文的背後,猛然間把他的木頭車來一個 180 度大迴轉,向着來時的路退回去,只留下一串漸漸減弱的話語:"阿文下次再聊,先這樣吧."

阿文回過身一看,這才知道"蛇仔明"為什麼望風而逃.原來是"牛精洪"帶着幾個馬仔大步流星地向這邊走過來.這個"牛精洪"是廟街一個幫會的小頭目,專門負責放高利貸和收賬.
"牛精洪"走到阿文的身邊,先罵了一句: "這個兔崽子,算他走運,下次見面先把他的狗腿打斷."
接着就問阿文:"阿文,收工啦?"
"是的洪哥,我剛收工."阿文回應他，"蛇仔明又欠了很多賬嗎?"
"數目倒是不大,可氣的是上星期他贏了馬也不主動還錢,真他媽的王八蛋!"
阿文說:"洪哥真是消息靈通."
"蛇仔明這人,贏了點小錢就到處吹他有獨家貼士,這條街有誰不知道."
"話說回來,洪哥,他不還錢,你不是能多賺利息嗎?"
"我怕他下次連老婆本都輸清光,我可沒法向老大交待."
阿文知道"牛精洪"這些場面話是說給他的馬仔聽,笑一笑沒搭腔.
"牛精洪"拍一下阿文的肩膀問:"今天晚上紅姐回來廟街開派對,你們曲藝團還開檔嗎?"
阿文說:"當然要開,紅姐已經上了岸,我們還在海里漂着呢."
“阿文你真會說笑.誰不知道你們這幫人是賺錢買花戴的主呀.”"牛精洪"笑着說:"好了,我還有事,要走了."說完就領着幾個小弟揚長而去.
阿文對着他的背影說了一聲:"洪哥走好."

這個"牛精洪"是典型的廟街"地膽",從小就跟着他的叔叔混江湖.在一次幫會鬥毆中,他為了掩護自己的老大撤退,中刀摔倒之後還死死地抱住對方的腳,多挨了對方幾刀.事後老大對他自然大為讚許。“牛精洪”雖然只是小學畢業，但對數字有特別敏銳的觸覺。於是老大讓他領着幾個小弟放賬收賬."牛精洪"長得五大三粗,皮膚黝黑,不熟悉的人都以為他是一個莽漢.其實他是一個粗中有細,進退有序的精明人.他對廟街的大大小小商戶和"潛在客戶"的經濟狀況都很清楚,放賬的數額拿捏得很準.他把向他借貸的人分成不同的類別，借貸的利息也各有不同。如果是商販拆借，他會收取較低的利息。至於一般沒有固定收入的“蠱惑仔”借貸，收取的利息相對就要高一些，因為這些“蠱惑仔”說不定哪一天失蹤，風險要大一些。不過，和某些“大耳窿”那種“九出十三歸”的借貸方式比起來，“牛精洪”算得上是“大善人”了。“九出十三歸”的意思是，借款人將要為借貸的數額支付 30 % 的利息。譬如說，你要向“大耳窿”借 1,000 元，還款期到了就要還 1,300 元。但是，你借款當天到手的實際金額卻只有 900 元。按照“大耳窿“的說法，那100 元是“無抵押借貸”的風險金和手續費。“牛精洪”定的利息相對有吸引力，他的催賬手段也還算客氣.雖然對於某些拖欠帳款的人他也會出言恫嚇,但從來不會把債戶逼到絕路.因此那些需要資金周轉的人都樂於向他借賬.自從他負責幫會的放賬業務以來，成績可算是蒸蒸日上，而且基本上沒有死賬,所以老大對他很滿意,也給了他更大的權限.

"牛精洪"提到開檔,阿文很自然地又想起了蘇師奶,他的姑姑.如果不是姑姑的大力推動,他們這個曲藝團未必會成立."牛精洪"說他們這幫人“賺錢買花戴”這話也有幾分道理。相對於在廟街擺攤賣唱的其他“曲藝團”，他們成立這個曲藝團的初衷的確不是為了牟利.

"廟街"在香港旅遊局的宣傳資料上被列作一個旅遊點，它被作為"poor people night club"介紹給外國遊客.“廟街”是九龍油麻地的一條街道，但是作為“平民夜總會”的“廟街”涵蓋的範圍絕不僅限於那條不算太長的街道。除了寶靈街與佐頓道南邊一小段“廟街”沒有燈光夜市之外。每到華燈初上，佐頓道北邊一段廟街全都是一個接一個的攤位。也就是說，從佐頓道的北側開始，中間還要穿過“加士居道”，一直到“熙龍里”，有為數眾多的大牌檔和售賣各式小商品的燈光夜市。在這裡，你可以買到男性服裝、針織服裝、汗衫、牛仔褲、鋼筆、手錶、錄音帶、錄像帶，電子產品、玩具、旅行袋。你也可以買到手工藝品、茶具、玉器、古董、以至成人用品等等等等。“廟街”最有特色的是天后廟前的“榕樹頭”。除了各類售貨攤子，這裡還有俗稱“照田雞”的占卜算卦攤子，有半蹲在樹頭的說書人，有不同類型的“曲藝團”表演不同的節目。由阿文的舅公“扯頭纜”成立的曲藝團就是其中一個演出單位。