z.6ERx^

　　(官话版)

　　“恭祝你福寿与天齐，庆贺你生辰快乐。年年都有今日，岁岁都有今朝。恭喜你!恭喜你!”

　　酒楼啲音响很一般，特点就是声音大。不过话又说回来，如果声因不大，恐怕又压不住喧闹的人声。

　　礼堂正中挂了一个大大的“ 寿 ”字，不是写的也不是画的，是用一张张贺咭砌出来。

　　(粤语版)

　　“恭祝你福寿与天齐，庆贺你生辰快乐。年年都有今日，岁岁都有今朝。恭喜你!恭喜你!”

　　酒楼啲音响麻麻哋，一味就够大声。不过话又讲返转头，如果唔够大声，又怕唔够啲人声墟冚啦。

　　礼堂正中挂咗大大个“ 寿 ”字，唔係写唔係画，係用一将张张贺咭砌出嚟嘅。

　　炳哥坐正喺个“寿”字前面嗰张大台，至细嘅孙女阿华陪住佢。今日係炳哥嘅八十大寿，满堂宾客除咗炳哥嘅亲戚，仲有佢嘅徒子徒孙。另外仲有十几个人最特别，佢哋唔算得係炳哥嘅亲戚，又同炳哥冇师徒关系。佢哋个嗰都有番咁上下年纪，有人拖男带女，有人打单泡。礼堂上刻住“义薄云天”四个大字嘅大金牌就係佢哋送嘅。

　　炳哥个孙女阿华对呢班人最有兴趣，但凡佢哋过来同炳哥打招呼，阿华就会问：“呢个係边个嚟咖，有冇乜嘢故事呀?”

　　呢班人个个都受过炳哥嘅恩惠，佢哋由大陆“较脚”到香港，最初都係喺炳哥间山寨厂落脚。

　　炳哥姓周，单名一个字炳。冇错，就係同“三家巷”裡面个主角同名同姓。咁仲唔止噃，炳哥后生嗰阵一样係青靓白淨又斯文

　　。虽然喺工厂做嘢，开工嘅时候少不免周身油屎。之但係一放咗工，佢就梗係执得乾淨企理至行出工厂嘅。炳哥技朮又好，车，铣，刨，磨样样都识，故此喺工厂都好多女仔锺意佢。其中有一位女技术员文娟生得好靓，大学毕业之后被分配到工厂嘅技术室。文娟工作热情好高，经常为咗技术改革方面嘅问题搵周炳研究。周炳虽然冇读过大学，但係有丰富嘅实际经验，两个人合作取得唔少成果，得到厂领导多次表扬。两人接触得多，渐渐有咗感情。文娟係党员，佢希望周炳亦都争取入党，做一个“又红又专”嘅革命人。次次讲到呢个问题，周炳硬係岔开话题，一啲都唔热心。文娟知道周炳係工人后代，谂唔明佢点解唔想成为“无产阶级先锋队”嘅成员，不免有些少惋惜。

　　周炳对“入党”唔感兴趣嘅部分原因来自佢个姑妈。佢嘅姑妈同姑丈都係老党员。姑妈係1925年嘅“六二三事件”参与咗组织印刷业工人参加罢工，解放后被安排做咗一个单位嘅领导人。姑丈亦係干部，级别仲高过姑妈，可惜1954年就过世啦。“反右”运动嘅时候，姑妈嘅单位喺“揪右派”方面落后于形势，领导搵姑妈谈话。

　　领导话：“你哋单位对于反右斗争嘅认识好唔够，到而家远远落后于形势，要好好检讨原因。”

　　姑妈话：“我认为应该实事求是，点都唔可以夹硬凑够百分之五啩?”

　　领导话：“你睇你睇，唔好低估群众嘅力量，好好发掘一下，千祈唔好产生抵触情绪!”

　　领导係姑妈嘅老上级，怕佢睇唔清形势犯错误，所以一再开导佢。亦由于长期共事，知道领导嘅为人，姑妈讲说话亦冇乜顾忌，领导一讲完，佢就接咗一句：“一係，将我自己划成右派算啦!”

　　领导块脸霎时白晒，下意识望咗一眼办公室闩到实一实度门，声震震咁话：“妳噏乜呀!真係越讲越离谱噃。睇嚟妳有病要即刻住院，写个报告申请病假啦。”

　　姑妈说一出口，自己都觉得不妥，送走老上级就联系熟人安排住咗入医院。根据医院嘅诊断意见，上级指派咗其他人接替姑妈嘅工作。半年以后，姑妈办咗“病退”，从此日日喺屋企踎，学下书法，打下太极。

　　周炳嘅爸爸係一个典型嘅技术工人，唯一信条就係“学成百艺好傍身”，从来唔会涉及任何“形而上”嘅话题。对于一个有求知欲嘅少年来讲，淨係咁样远远係唔够喉嘅，故此周炳中意去姑妈屋企玩。姑妈冇儿冇女，对于同自己生得有几分相似嘅周炳特别疼惜。姑妈屋企有好多藏书，都係已经过身嘅姑丈所留低。另外，周炳喜欢听姑妈讲故事。姑妈嘅故事同嗰啲说部，演义唔同，大部分係抗击殖民主义，帝国主义反动派嘅真人实事。除此之外，姑妈仲会对周炳讲一啲做人道理。周炳有乜嘢心事亦乐意对姑妈讲。文娟第一次对佢提“入党”嘅事，令到佢好突然，因为佢从来没谂过呢样嘢。佢就去搵姑妈倾。姑妈听咗以后，冇明确咁回应佢，淨係同佢讲咗自己“病退”前几个月嘅故事，包括自己同老上级嘅对话。最后，佢好似作总结发言咁讲：“后来睇到嗰啲被划成“右派”嘅人妻离子散，家破人亡嘅遭遇至深深感受到自己当年係几咁幼稚同愚蠢!”周炳对姑妈所讲嘅故事冇法子完全理解，眼定定咁望住姑妈，觉得姑妈呢一日有啲特别。

　　过咗几天，周炳再次到姑妈屋企嘅时候，姑妈写紧大字，写嘅係“己所不欲，勿施于人”。姑妈问周炳知唔知呢句说话点解?周炳话大概就係“自己不想做嘅事就唔好叫人哋去做”。姑妈话基本冇错，但係佢个人意见仲应该多加几个字。周炳问要加边几个字?姑妈提笔写咗“己所亟欲，勿强予人”呢八个字，周炳唔明。姑妈就话，意思係你自己觉得好嘅嘢亦唔好夹硬塞畀人。譬如喺南洋有一种水果叫做“榴莲”，当地人都很锺意食，有人甚至话佢好补。但係，“榴莲”有一种好浓嘅味道，唔接受嘅人会觉得一浸猫屎味。咁嘅话，即使你觉得榴莲大补，都唔应该强迫人哋接受。姑妈话锋一转，讲到交友之道。姑妈话，交朋友唔能够淨係听佢嘴上讲啲乜，要睇佢嘅行为。譬如有一个人时常话做人要尊老爱幼，但係撘公共汽车嘅时候往往当其他人冇到，左推右撞咁迫上车。呢挺人，只要见到有啲利益，佢就唔会理其他人係生係死，搏命去争嗰一啲利益。咁样嘅人千祈唔好同佢做朋友。姑妈又话，个人嘅力量好单薄，所以有时要联合其他人组成一个团体，讲得俗啲就係“埋堆”。有啲团体“和而不同”，内部有唔同意见时候会通过讨论协商以求达至统一意见;有啲团体“同而不和”,内部有唔同意见时候一係就老大话晒事，一係就斗餐死。所以，埋乜嘢堆之前，先要有个清晰判断。

　　有一日，文娟约周炳落班以后等佢一齐走，话有事要同佢倾。

　　落班以后，佢哋踩单车到咗工厂附近嘅一个公园，坐喺湖边嘅石凳。两个望住夕阳下嘅湖水好耐都没开声。后来都係周炳先开口：“妳唔係话有事要同我倾嘅咩?”

　　“我爸爸个老战友想将佢个仔介绍畀我谈对象，我爸爸妈妈都好锺意佢。”

　　“哦，你爸爸嘅战友。係啦，前几日工会主席话我知你爸爸係大干部，係吗?”

　　“係干部又点啫?”

　　“我谂......你父母会唔会唔接受我呢?”

　　“而家乜嘢时代啦，仲讲究门当户对咩?”

　　“问题係，而家有门当户对嘅机会，佢哋係唔係都会谂下呢?”

　　“咁都要我同意先得咖，唔通佢哋可以包办婚姻咩?”

　　“个男嘅你见过未呀?做乜嘢咖?”

　　“喺我哋屋企见过几次，係军队里面嘅政工干部。”

　　“妳对佢印象点呢?”

　　“冇乜点。满嘴大口号，又中意晒佢啲社会关系，华而不实。”

　　“哦......”

　　“我想将我哋俩个嘅关系同爸爸妈妈说清楚，你睇好不好?”

　　“咁呀，不如试下冷处理先?”

　　“点冷处理?”

　　“先拖一阵至讲。”

　　“唔得，我要同佢哋讲清楚，等佢哋死咗条心。”

　　自从工会主席无啦啦向周炳透露文娟嘅家世嗰一日起，周炳就觉察到佢同文娟件事要起变化。见到文娟仍然信心十足，佢既感动又为文娟担忧。佢怕到咗不得不分手嗰一日文娟会受唔住打击。但係佢又不愿意挫伤佢嘅自信心，只好静观其变。文娟果然向佢嘅父母摊牌，佢嘅父母虽然唔高兴，但係冇讲乜嘢负气说话，咁样嘅结果令到文娟大受鼓舞。周炳硬係觉得件事情冇咁顺摊，不过亦都乐观其成。三个月后，文娟话周炳知，部里面发咗个培训名额畀佢哋厂。厂领导决定由佢去北京接受培训，时间係一年，佢希望周炳喺呢一年内创造多啲成绩，争取入党，到佢学成返嚟就係双丰收啦。周炳忍住失去爱人嘅伤痛心情祝福佢，又保证会努力工作，争取进步。

　　文娟走咗冇耐，周炳接到一张调令，调佢去系统内一家规模比较细嘅工厂做车间副主任。周炳知道呢间厂“大干快上”口号催生出嚟嘅产物，建厂前论证不足，产品唔对路，由建厂嘅第一日起就靠行政补贴，今次调动好明显唔係去填凼就係去孭镬。不过，当前嘅体制下由不得佢抗命，唯有收拾行装赴任。令佢啼笑皆非嘅係文娟知道咗呢件事仲大为高兴，认为係上级对周炳嘅信任同培养。周炳再次为文娟不知世途艰险担心。

　　周炳嘅担心并非毫无根据。当时调佢到呢间厂嘅理由係要加强呢间厂嘅技术力量，但係周炳到任之后，厂里面并冇任何迹象会有乜嘢变化。令人怀疑嘅係厂里面有传言话厂一级嘅领导都搵紧码头，想话调去其它单位。尽管心有疑虑，周炳都係尽力完成自己嘅工作。半年以后真相终于大白，间厂开大会宣布要“下马”，部分职工另有安排，大部分青年工人可以选择“上山下乡”，为国家分忧。厂领导话”一颗红心，两种准备，到祖国最需要的地方去”係一项有深远战略意义嘅措施。除了佢哋呢啲青年工人，仲会包括一啲应届毕业生同社会闲散人员。这项政策既解决咗城市闲散劳动力嘅浪费，亦为建设社会主义新农村输送咗大批生力军。凡係选择咗“上山下乡”嘅人都可以获得由公安局发出嘅《四年户口保留证》，四年后就可以回城落户并且安排工作。

　　散会后周炳即刻去姑妈家将件事讲畀姑妈知。姑妈听咗冇讲嘢，叫佢返屋企先，话迟下会搵佢哋一家好好地倾下。过咗三一，姑妈约咗周炳嘅父母同埋周炳去佢屋企开咗一个家庭会议，倾吓去不去农村呢个迫切嘅议题。

　　周炳个老母首先问：“大姑奶，你见多识广，有冇办法可以唔去呢?”

　　姑妈话：“理论上你可以选择唔去。但係，首先你会俾工厂开除，今后有冇机会再安排工作就好难讲啦。”

　　阿妈话：“咁都好呀，起码保留咗个广州户口呀。”

　　姑妈话：“既然今次连社会青年都动员啦，话唔埋都係顶唔得耐咖。”

　　亚炳个老窦关心嘅係另一样嘢，佢问：“阿炳，厂里面有冇话落乡工龄仲计唔计，发不发工资呢?”

　　周炳应话：“听讲我们去嘅係国营农场，算农业工人，工龄照计，亦都係个个月发工资，但係未必按照原来嘅工资水平。”

　　老窦沉吟咗一下就话：“咁都可以考虑。横掂四年以后返嚟可以安排工作嘛。”

　　阿妈忧心忡忡咁讲：“至怕四年后又有变化......”

　　阿妈话口未完，阿爸就打断佢嘅话头：“会有什么变化啫，上面有公安局大印，唔通会唔算数咩?”

　　姑妈话：“咁又唔係咁讲啦，到时如果上头话根据形势需要，你哋要捱多几年亦唔係冇可能咖。”

　　阿爸一向敬服自己嘅大姐，听佢都咁讲就冇再坚持自己嘅意见，转头问个仔：“咁你自己有乜打算?”

　　周炳话：“我还未谂好。”

　　最后都係谂唔出乜嘢好办法，唯有拖一阵再讲。

　　查实周炳冇对三位长辈讲老实话话。得知要落乡的消息嗰一日起，佢除咗搵姑妈之外，仲搵咗自己个师傅。佢个师傅已经退休，一向都好惜周炳。周炳亦係时常去探望佢他老人家。师傅即刻安排佢同其他两个师弟见面。原来嗰两位师弟亦係面临同样嘅问题，而佢哋已经决定要偷渡去香港。周炳从来未谂过要“较脚”，所以好犹豫。但係听咗两位师弟嘅分析，觉得未尝唔係一条出路。不过佢实在唔知道要点样对父母讲出来。师傅劝佢先谂清楚自己係唔係真係要行呢条路，如果确定咗，其它嘢由师傅埋尾。经过一段时间嘅筹备，三个后生仔喺一个月黑风高嘅夜晚离开咗满载住记忆嘅城市同埋家人，迈出“较脚”嘅第一步。

　　周炳同两位师弟顺利到达香港。两位师弟香港都有亲人，其中一个师弟将周炳带去佢舅父屋企住咗一晚，第二日再陪周炳揸住师傅封信去搵师傅个朋友。师傅个朋友亦係一个热心人，当场就收留咗周炳，请佢喺自己间机器厂做嘢。后来，师傅嘅呢位朋友仲做咗周炳嘅外父，间机器厂亦都交畀周炳打骰。再后来，呢间机器厂又成为一啲“较脚友”嘅“51号兵站”，他们踏足人海茫茫嘅香港，喫到嘅第一啖安乐饭就喺呢间细细哋嘅机器厂。

　　周炳接济第一个较脚到埗嘅係佢一位老同事，亦係佢嘅师弟。呢位师弟当年揸住嗰张《四年户口保留证》到咗珠江三角洲一个大农场，做咗一嗰“光荣的农业战士”。佢哋依山建屋，围海造田，种水稻，种甘蔗,种经济作物，逐步完成咗从工人到农民嘅过渡。但係，好多人夜静更深时候仲係憧憬返番城市落户之后嘅生活。佢哋点都估唔到，当佢哋揸住嗰张有个大红印章嘅《四年户口保留证》返广州上户口嘅时候，“革委会”畀佢哋嘅答复竟然係：“四年保留户口”政策是资产阶级反动路线的产物，予以作废。佢哋组织咗游行，嗌住“要户口，要食饭”嘅口号，抬住棺材游行，结果全部被遣送返农场。为首嗰几个仲俾农场“革委会”定性为“破坏文化大革命”嘅黑人物。师弟痛定思痛，决定用自己双脚行自己嘅路。

　　从此以后，周炳接待咗一批又一批“较脚友”。呢啲人有啲同佢咁上下大，有啲人细佢十几岁。只要佢哋能够搵到周炳，佢就一定出手相助，永冇托手踭。佢哋有人住几天，联系咗朋友同学就搬走。有啲就先喺佢间厂度里帮帮手，搵到更啱自已嘅工作至离开，总之大家同捞同煲，有饭食饭，有粥食粥。二十几年嚟，呢班人无论各自有乜嘢发展，都唔会忘记当年牛头角炳哥呢间细细间嘅山寨厂昏黄而又温暖嘅灯光.